Dhalinyaro Soomaali ah oo ka kala yimid wadamada Denmark, Norway iyo Sweden ayaa booqasho ku jooga gobolka Soomaalida ay ku badan tahay ee Minnesota. Waxaa dhalinyarada wada oo keenay dowlada Mareykanka gaar ahaan safaarada Mareykanka ay ku leeyihiin wadanka Denmark.

Sababta loo keenay ayaa ah in ay darsaan kana faa’iideystaan horumarka Soomaalida degan Minnesota. Waxaa la tilmaamay in Soomaalida Minnesota ay aad uga horeeyaan Soomaalida degan wadamada Yurub.

Waxaa lagu soo wareejiyay ganacsiyo iyo hay’ado ay leeyihiin Soomaalida. Waxay shalay booqdeen hay’ada African Development Center oo ah hay’ada ugu weyn ee maalgelisa ganacsiyada yar yar. Hay’adan waxaa aas aasay madaxna u ah nin Soomaali ah oo la yiraahdo Hussein Samatar.